中環出更：憶牛屎當炭燴番薯 余漢坤：冇異味
新界以往有唔少農田，農民為方便務農，養咗唔少牛隻，所以新界人過往被戲謔滿腳牛屎。自細喺大澳長大嘅離島區議會副主席余漢坤都同牛屎頗有關係，佢仲自爆以前會將牛屎當做炭，用嚟燴番薯添！
余漢坤解釋，以前所用嘅係乾牛屎，所以係冇任何異味嘅，而且牛有兩個胃，排泄物都相對乾淨，用錫紙包住番薯嚟燴就冇問題o架喇。不過，佢都試過將番薯直接放喺牛屎上面燴，仲話番薯有皮包住，食嘅時候搣皮就得喇喎。
務農艱難 梁福元促港府支援
作為城市人，聽到余漢坤呢個童年經歷相信都覺得難以置信。而依家佢已為父親，都話唔敢畀仔女用同一個方法去燴番薯喇。因為依家離島唔少牛隻都受感染，牛嘅生長環境亦有別於以前，甚至靠食肉類同垃圾維生，佢仲見過牛隻生蟲，覺得現時香港嘅牛好多菌。
同係新界人嘅十八鄉鄉事委員會主席梁福元就大嘆務農人士要睇天做人，好似今年咁，出現咗十幾年冇見過嘅乾旱，又突然落咗幾日豪雨，導致水浸，預料今年荔枝同龍眼都會因乾旱而唔飽滿，而突如其來嘅豪雨都會令產量減少。佢又話，依家農業都要走向現代化，政府應該拆牆鬆綁，提供優惠政策，否則都難以吸引人從事農業，請人都難喇。
不過環保協進會總幹事邱榮光就話冇請人煩惱，事關現時大學都要求學生必須做實習，所以佢哋今年都請咗十幾個實習生幫手。但佢就覺得大學生英語能力有所下降，未來翻譯行業可能都會被取代。因為依家啲翻譯機發展愈見成熟，甚至連地區方言如客家話等都可以翻譯到，所以佢哋遲啲邀請日本人嚟研討會，都會考慮用翻譯機喇。
卓妮