中環出更：彈塗魚成搶手貨張學明冇捉過
近期彈塗魚成搶手貨，皆因盛傳有壯陽功效。新界鄉議局副主席張學明自幼喺鄉村長大，就話無聽過呢個功效，而且佢以前冇捉彈塗魚，反而會捉其他魚咁話。
彈塗魚主要出現喺泥灘，所以張學明話佢所住嘅林村較少有彈塗魚出現，但田間就會有紅色嘅魚仔，佢以前去捉魚都係為咗娛樂，而唔會捉啲魚去食，佢更話連塘虱都可以徒手捉添！
當日活動係新社聯成立周年會慶酒會，除咗作為榮譽會長嘅張學明，理事長陳勇同副理事長李世榮當然都有現身。陳勇話學車全因張學明，事關當年張學明話跑新界一定要有車囉！不過陳勇就話考咗車牌都甚少揸車，因為駕駛時有好多嘢要兼顧。佢更話自己揸車夠晒小心，事關當年連考車牌個考官都嫌佢揸得慢，叫佢可以開快啲，但佢就強調自己一剔Pass咗。
至於李世榮就曾經同立法會議員劉國勳、北區區議員姚銘等人去馬來西亞自駕遊，佢覺得去外國揸車最緊要有其他人輪流做司機，因為車程遠，長期依賴一個人就太辛苦。不過，佢就反而冇試過同仔女去自駕遊，因為小朋友去旅行啱玩嘅地方多數係大城市，搭交通工具反而更方便。
王賢訊愛一家大細自駕遊
同場嘅仁濟醫院第一副主席王賢訊就有三個小朋友，亦鍾意同佢哋去自駕遊，所以近期有自駕遊致命交通意外都會照去咁話。而佢嘅自駕遊心得就係要太太幫手睇導航帶路，因為司機難兼顧，所以最怕自駕遊時，太太玩得太攰同小朋友齊齊瞓咗覺。
卓妮