政情：高鐵沙中線頻出事陳帆民望插水
廣深港高鐵香港段工程接二連三被揭發出現問題，包括列車試運行期間「出軌」、隧道漏水等，而港鐵沙中線工程亦爆出地盤鋼筋被剪短造假醜聞，主責嘅運輸及房屋局局長陳帆可以話係周身蟻。而佢嘅民望亦隨住連串事故而插水，根據最新一份民意調查結果顯示，雖然現時十三名政策局局長中，有十人嘅支持率淨值都係下跌，但陳帆嘅跌幅就最大，下跌十三個百分點，支持率淨值只有負六個百分點。陳帆咁樣插水法，相信唔盡快搞番掂高鐵同沙中線嘅蘇州屎，民望都好難浮番上水面喇！
10個局長支持率淨值均下跌
香港大學民意研究計劃於本月四至七日，以電話訪問咗約一千名香港市民，發現新一屆政府十三名局長當中，有十個民望插水的局長，佢哋嘅支持率淨值均下跌，包括食物及衞生局局長陳肇始、公務員事務局局長羅智光、商務及經濟發展局局長邱騰華、環境局局長黃錦星、財經事務及庫務局局長劉怡翔、發展局局長黃偉綸、政制及內地事務局局長聶德權、教育局局長楊潤雄、民政事務局局長劉江華同陳帆。
喺呢十名民望插水的局長當中，以陳帆嘅支持率淨值下跌得最多，只有百分之二十五受訪者表示支持佢出任局長，反對嘅有百分之三十一，支持度淨值為負六個百分比，較上月同類調查下跌百分之十三。同陳帆一樣，支持率淨值錄得負數嘅仲有兩個局長，佢哋分別係楊潤雄同劉江華，而劉江華嘅支持率淨值係十三名局長之中最低，為負百分之二十。
至於支持率淨值上升嘅局長，只有勞工及福利局局長羅致光及創新及科技局局長楊偉雄，兩人分別上升百分之四同百分之一，支持率淨值為百分之三十八同零個百分比。而支持率淨值不變嘅就有保安局局長李家超，維持百分之十七。
另外，政務司司長張建宗、財政司司長陳茂波同律政司司長鄭若驊嘅評分分別為五十一點六分、三十九點五分及四十分，而陳茂波同鄭若驊嘅支持率淨值都係負值，分別為負百分之三十三及負百分之十九。政府新班子大部分問責官員嘅民望都插水，睇嚟真係要面壁思過，好好反省吓先得喇！