中環出更：飛機遇颱風降落唔到 施榮懷嚇破膽
好多人趁住暑假同家人外遊，但遇到天氣不似預期而航班延誤，都咪話唔掃興！不過打亂行程事小，如果涉及人身安全就事大喇！香港中華廠商聯合會永遠名譽會長施榮懷就試過喺飛機上「大落大上」，當時佢係由新加坡飛返香港，起飛前已經知道香港打風，但見只係三號風球所以決定照飛，殊不知呢個三號風球有八號風球嘅級數，搞到飛機無法降落，佢好記得當時機師話會嘗試降落兩次，點知第一次降落就已經承受唔住惡劣天氣，被迫飛返上去，搞到佢都嚇破膽！
最後機師冇嘗試第二次降落，直接改飛菲律賓，施榮懷被迫喺菲律賓過一晚，第二日先返到香港，原本約咗人食飯都被迫改期所以佢之後都減少喺暑期去旅行，特別係東南亞，免得因為天氣而浪費時間，要去嘅話會傾向喺聖誕節去，咁行程安排上就可以安心啲。
不過，香港菁英會榮譽主席盧金榮就試過因為延誤而覺得興奮，不過嗰次同天氣無關，而係因為香港機場嘅閘口數量唔夠，搞到飛機到咗香港空域都冇位降落，要喺上空盤旋，正在等候降落指示之際，佢發現除咗自己坐緊嗰架飛機，仲有五架飛機喺附近飛緊，前面三架，後面兩架，而最壯觀嘅係最後降落時六架飛機排住隊咁順序降落，令佢至今都歷歷在目！但呢啲經歷一次就夠喇，佢話機場閘口數量不足嘅問題要解決，而且延誤會搞到人心慌慌，都係可免則免喇！
李家祥見慣航班延誤
馬會大董李家祥直言自己經驗豐富，因為經常出外公幹，對航班延誤已司空見慣，仲話坐得飛機一定要預佢會延誤，所以佢通常都唔會喺落機時間打後嘅二十小時內約人，如果因航班延誤而甩底就唔好啦！
卓妮