政情：做唔夠6年科技園不續任羅范執包袱
再多一個由前特首梁振英喺任內委任嘅公職人士，將會不再續任。消息指，科技園公司董事局主席羅范椒芬在任期屆滿後將不會續任，佢已出任呢個職位約四年，原本最多可獲委任多一屆做足六年，但佢就唔會續任。羅范並非首名由上屆政府過渡至今屆、未有做足六年公職嘅人士，此前已經有獨立監察警方處理投訴委員會（監警會）前主席郭琳廣同埋審查貪污舉報諮詢委員會（審貪會）前主席譚惠珠，兩人同樣冇做足六年。咁樣大換血，唔通係呢屆政府展開「去CY化」工程？
傳與楊偉雄不和 礙創科發展
「六六規定」係港府委任公職一個不成文嘅規定，即指同一人不可同時擔任超過六項公職、任期不超過六年。羅范自二○一四年七月起開始出任科技園主席，理論上最多可以做多兩年，直至二○二○年。不過有消息指，羅范唔會續任，到底係佢主動提出定係被換走，眾說紛紜，不過佢同創新及科技局局長楊偉雄不和，已係創科界公開嘅秘密。科學園係本港創科核心之一，兩人嘅關係亦影響港府推動創科發展，若果兩人未能同心，都唔係件好事。因此早前已有傳言指羅范唔會完成今屆任期，惟最終羅范只做到屆滿就唔做。
郭琳廣譚惠珠 亦無做足六年
由梁振英喺任內委任公職嘅人士，近排開始陸續離場。港府上月公布由資深大律師梁定邦接替郭琳廣，由本月起出任監警會主席。郭琳廣淨係做咗四年就冇做，同樣冇做足六年，係佢冇得撈，定係唔撈？有人話，郭琳廣係因為個人事務繁忙，主動向特首請辭。
至於譚惠珠就喺去年底決定唔再做審貪會主席，即係做咗一屆僅三年就唔玩，其時有指佢係自己決定唔續任，因為想抖吓。出任公職的確唔容易，勉強係冇幸福嘅，咁樣換下又一個，換下又一個，上屆政府委任政界人士做公職，累計最少三個做唔足六年，唔知遲啲會唔會陸續有來呢？