中環出更：黃國健呻做議員不再光宗耀祖
過往官式稱呼立法會議員時，通常會加個「honourable（尊貴）」嘅字眼，反映議員受尊重嘅社會地位。不過隨着議會亂象頻生，呢個尊貴身份似乎已成過去式。工聯會立法會議員黃國健（KK）尋日出席立法會前議員劉慧卿嘅網台節目時，就呻話依家做議員都唔係咩光宗耀祖嘅事喎。
點解KK咁講？事緣已經做咗十年議員嘅佢，試過好多次坐巴士、港鐵嘅時候，見到啲市民明明認得佢但又扮唔認得，然後就竊竊私語話：「唉！啲議員人工成十幾萬一個月，都唔知做乜嘅！」KK話，每次聽到同類嘅說話，都不禁慨嘆依家議員喺市民心目中嘅形象愈嚟愈差。
斥有新人靠激進爭取支持
KK仲話，呢個情況係近年先出現，究其原因，佢認為一來係議會嘅效率低，二來係議員嘅議事手法及質素每況愈下，因為老一輩議員多數比較有原則，會守規矩，不過部分新入議會嘅議員，就鍾意用激進嘅方法爭取支持，令激進文化喺議會內蔓延。難怪佢忍唔住慨嘆議員一代不如一代啊！
卓妮