中環出更：鹽酥雞屁股方曉嵐一試愛上
台北一直係港人最鍾意外遊嘅熱門城市，尋日台北觀光傳播局特別跨海而來，同港人推介台北尋味趣手冊及接地氣美食，文化食譜作家方曉嵐、中國烹飪協會榮譽副會長梁震宇都有到場。方曉嵐去過台灣好多次，近年仲搞美食團帶隊去搵食，笑言自己一向唔食雞屁股，但係喺台灣試咗一啖鹽酥雞屁股之後，抵擋不了佢嘅魔力，仲大讚好食添！
方曉嵐又話，台灣除咗保留傳統嘅食物外，亦都不時有新嘅創意。反觀香港好多傳統小食因為租金問題而漸漸唔見晒，所以佢好支持香港整番個夜市，好似以前大笪地，咁就正喇。
梁震宇去台灣除咗搵美食之外，仲對台灣靚女有深刻印象，笑稱好鍾意台灣女仔講嘢有尾音，好嬌嗲。近年佢去台灣又多咗一個重任，就係帶小朋友去木柵動物園。佢話自己細個仲可以去荔園睇動物，依家想睇就要離開香港先得。仲話依家想喺香港起番個動物園睇怕係幻想，因為土地不足，最重要係營辦動物園係要政府先做到，私人機構好難搞。
台北觀光傳播局局長陳思宇及台北經濟文化辦事處處長嚴重光都喺度，卓妮問佢哋鍾意食乜香港美食，派駐香港近十年嘅嚴重光話喜歡蘿蔔絲酥同燒肉，仲大讚蒸魚好好食，喺台灣食唔到呢個水準。
陳思宇鍾意飲茶食點心
至於陳思宇係第二次來港，鍾意喺香港飲茶食點心，當中最鍾意食炸水餃。細問之下，原來靚女講緊鹹水角，估計係國語發音「水角」同「水餃」差不多，有美麗誤會啩？
卓妮