政情：周宛賢撐陳家希征高峰「大滿貫」
早前成功登上世界最高峰珠穆朗瑪峰，成為登峰最年輕港人嘅十九歲青年陳家希（Benjamin），其追夢鬥志夠晒勵志。早兩日成功登峰嘅幾位登山達人開咗一場慶回家派對，香港表廠商會會董周宛賢（Amy）都有去，佢大讚Benjamin有挑戰自我嘅精神，仲話有興趣支持佢繼續征服全球七大洲最高峰，取得「探險者大滿貫」嘅目標咁話。
冇諗過挑戰珠峰
Amy喺社交網站放咗幾張相，其中包括佢同Benjamin嘅合照。細問之下，原來Amy家族旗下一個鐘錶品牌有份贊助今次登峰壯舉，不過佢都係當晚先至識Benjamin。Amy笑笑口話，公司一向支持攀山及登峰活動，不過佢自己就好少玩呢啲活動，挑戰珠穆朗瑪峰更加連諗都冇諗過。
以為Amy係身嬌肉貴嘅太子女？錯喇，佢每一年都會到外地做義工或義教，下個月就會去青海九日，期間會教村民讀書、做清潔等，磨練自己之餘，亦為有需要人士伸出援手，真係有愛心。