政情：偏心冇溝通 政府辣㷫建制派
過去多年，行政立法關係經常緊張，每屆政府唔係同建制派眉來眼去，就係偏袒民主派。去到今屆政府上場硬銷「大和解」，承諾新增五十億元教育經常開支，令民主派的教育界議員葉建源攞晒彩，建制派已經興過火屎，其次亦批評政府鮮有同佢哋溝通。如今政府上任將近一年，官員辣㷫建制派議員嘅例子實在不勝枚舉，搞到有建制派議員聲言必要時唔撐政府，怒火已到達臨界點，一觸即爆。
討論議題 徐德義唔理人
講起辣㷫議員，早前就有食物及衞生局局長陳肇始臨時甩底缺席黃大仙區議會會議，搞到成個區議會一齊鬧佢「冇口齒」，之後陳喺立法會工務小組討論聖母醫院重建項目時亦唔見影，結果一樣被人「圍插」。陳肇始嘅副手、食衞局副局長徐德義都不遑多讓，雖然佢一上任已經講明「唔會做lobbying（游說工作）」，但有建制派議員就爆料話，有次主動搵佢討論議題都唔理人，真係嬲到爆！
事源係嚟緊本月中嘅立法會食物安全及環境衞生事務委員會將會討論規管電子煙事宜，其實呢位建制派議員早就喺二○一五年提出要規管，如今拖咗三年已經嬲嬲哋，不過諗住遲到好過冇到，所以主動聯絡徐德義見面，了解吓政府諗住點做，點知徐德義一句「出咗paper（文件）你咪知囉！」就打發佢走，真係火上加油，激到嗰位議員都話「成日要建制派撐政府，你哋做到咁都唔知點撐！」
羅致光補鑊 陸續約見面
勞工及福利局局長羅致光一樣為建制派眾矢之的，早前有民主派議員喺立法會前廳入面，見到勞福局副局長徐英偉被一名建制議員鬧到頭耷耷，原來係因為羅致光冇同各政黨議員「飲過咖啡」，前後搞到起碼三十幾個議員不滿。勞福局事後解釋，羅致光係覺得無論有咩都可以喺正式會議上討論，唔需要事前摸底喎，不過見徐英偉被人鬧得咁甘，羅致光最近都補緊鑊，陸續約番啲議員會面喇。