中環出更：陳振英教議員開電子錢包
唔少香港人都因為開設唔到內地電子錢包，喺內地工作同生活好唔方便，原來唔少立法會議員都有呢個煩惱，仲紛紛向金融界議員陳振英（Ronick）求助。Ronick尋日出席一個研討會時爆料，話年初搵咗幾位銀行同事幫十幾個立法會議員開電子錢包，不過有啲議員因為冇內地銀行戶口，始終都開唔成喇。
Ronick話，喺內地冇電子錢包真係唔多方便，不過佢都係做咗立法會議員之後先開電子錢包，因為同事幫佢買外賣時，都唔使準備散紙找嚟找去。佢覺得香港人對電子錢包有戒心，唔少人都冇的起心肝去開，港府應該多啲推廣，等香港多啲地方可以用電子錢包畀錢，咁就自然多啲人會開嘞。
葛珮帆試過買唔到嘢食
同場嘅立法會議員葛珮帆亦都話，喺內地冇電子錢包，畀錢相當唔方便，佢就試過因此搞到買唔到嘢食，最後要問朋友借錢。而佢為咗開設內地銀行帳戶以使用電子錢包，足足返咗內地三次，先至搞得掂。
智慧城市聯盟主席楊全盛（Eric）就話，太太最近都想開電子錢包，但事前又冇問佢，結果因為冇填寫內地住址而開唔到內地銀行戶口。Eric話，其實佢屋企喺內地有樓，只係一向冇信寄去嗰個地址，要搵個住址證明都好困難，結果搞咗好耐都開唔到戶口。聯盟副會長楊文銳就話，依家喺內地搭的士，叫車就可以用應用程式叫得到，但係畀錢時就要用電子錢包，如果你同個司機講冇，可能就會畀司機懷疑喇。
保險界立法會議員陳健波同金融服務界立法會議員張華峰（肥老闆）都有出席研討會。近日持續高溫，「分量十足」嘅肥老闆外出會唔會好辛苦呢？肥老闆就話，夏天最緊要多飲水，不過呢幾日有少少落雨，涼番啲，佢都可以打番呔咁話。
卓妮