油尖旺區議會不久前通過要求政府取消旺角西洋菜街行人專用區的動議。「殺街」在即，有人歡喜有人愁，住在旺角行人專用區樓上的居民終於可舒一口氣：今後可以有個寧靜的夢！而一眾街頭表演者突然失去「個人表演舞台」，不論為興趣或營生，難免會有所失落。
事實上，旺角行人專用區的設立，原意是疏導人流車流以方便行人，可是十多年來「無王管」，已經變質變味，不但未能疏導人流，反而街頭藝人的聚集，一些無牌小販從事「商業活動」，易拉架無數，對附近居民、行人、商舖造成相當滋擾，而樓上住客不少更是劏房戶，居住環境已侷促，加上噪音的轟炸，有乜可能唔怨聲載道？老朽每星期都會有一、兩晚去附近嘅樓上書店逛逛，一出旺角港鐵站就會感到行人專用區人潮洶湧，聲浪之巨也令悶熱的天氣更加鬱結。
當區居民感到高興，吾人若以心比心，完全可以理解。然而一眾反對派政客如涂謹申，一方面指噪音問題對居民和商戶是「酷刑」，一方面又話應該讓政府提出加強規管建議。其實係人都知，有大量人流聚集嘅地方必然會出現噪音滋擾，再讓政府搞一輪諮詢研究再研究諮詢，睇怕「規管」得嚟已經有唔少人因飽受噪音滋擾而患上抑鬱症！如此本末倒置嘅建議，係所謂「尊重民意」嘅民主黨才會諗到！
至於向來「堅離地」嘅公民黨如陳淑莊之流，一味扮悲天憫人，政府早前斬病樹就話樹命大於人命，「砍樹等同毀滅香港人歷史」，誰知被當區居民大聲棒喝：「收聲啦，你住邊度呀？」今次要取消旺角行人專用區，還當區居民一個寧靜的夜晚，一眾「藍血人」就話藝術大過生活，把自己的「藝術」強加於他人的痛苦之上，這是哪門子的「藝術」？
反對派高高在上，不食人間煙火，一味清談，香港有乜可能唔沉淪？