本港樓價有上冇落，社會有聲音批評一手樓空置率高，係樓價飆升嘅元兇之一，政府推出再多土地都難以壓抑樓價。財政司司長陳茂波（波叔）尋日出席立法會財經事務委員會時，提到針對完成興建但未出售嘅一手樓，政府係咪會徵收稅項時，聲稱有關研究已到尾聲，會盡速有決定，如果付諸實施亦會盡速公布。所謂嘅「盡速」，喺市民眼中只係「龜速」，令人覺得政府歎慢板、採拖字訣。樓價日日創新高，市民望樓興嘆，唔通要等到樓價升上太空？
