政情：收超貴牛肉乾 葉傲冬難忘有價講
唔少香港人外遊都會選擇自駕遊，油尖旺區議會主席葉傲冬就有個難忘自駕遊經驗，佢話十幾年前去奧地利自駕遊時，曾經收到六百五十歐元嘅超貴「牛肉乾」，即大約港紙五千多元。好彩佢喺德國實習時嘅公司老闆幫佢寫求情信，話佢月薪只得三、四百歐元，結果奧地利警方竟然話可以收平啲，真係估唔到罰款都有價講喎！
肉赤車牌被撞爛
講番揸車，葉傲冬考咗車牌十九年，考牌咁耐就揸咁耐，點知呢一日朝早就遇到近廿年首次發生嘅事故，佢心愛嘅越野車被人撞爛咗個車牌，肇事者仲要不顧而去，真係肉赤。葉傲冬話，因為下午仲要出席理工大學舉行嘅長者盆菜宴，未有時間修理，所以用膠紙黐住先咋。
