政情：蔡百泰推動社會共融 家傭少主扮靚返學
潮流興講社會共融，仁濟醫院前主席蔡百泰就付諸行動，早前以佢命名嘅幼稚園及幼兒中心舉行活動時，除咗小朋友着民族服裝之外，校方都鼓勵家長畀工人姐姐着佢哋嘅民族服飾出席活動，結果一班菲、印家傭反應熱烈，同家中少主一齊扮靚返學兼玩埋一份，氣氛好融洽。
印尼姐姐仲自發煮美食
蔡百泰話，當日家傭們唔止表演助興，仲有印尼姐姐自發烹煮印尼美食畀嘉賓品嘗。佢話近年東南亞家庭傭工數目不停增加，至少有為數逾四十五萬不同膚色、不同種族嘅居民住喺香港，所以推動社會共融好重要。
早喺廿年前，蔡百泰做仁濟主席時就預見品德教育嘅重要性，故此捐助創立「仁濟醫院德育及公民教育獎勵基金」，每年藉住舉辦德育及公民教育獎勵計劃，推廣品德教育，初期以中小學生為目標，後來擴大至幼稚園。依家用呢種咁有趣、好玩嘅方式推動種族共融，又幾貼地喎！