中環出更：郭位自爆集百年郵票
城市大學展覽館及法國五月藝術節聯手舉辦嘅「藏珍閣」藝術展早前舉行開幕儀式，現場展出好多歷史悠久嘅生物標本及文物古藏。城大校長郭位笑笑口話，細個冇捉過蝴蝶或昆蟲嚟做標本，不過就有集郵嗜好，仲形容係「五、六十年前買四十年前的郵票」，即係成一百年前嘅郵票。佢話呢批郵票放喺台灣老家，後來佢負笈海外求學、工作，唔知係咪仲喺度，如果係就好值錢喇！
「藏珍閣」喺十六至十九世紀於歐洲風靡一時，當時啲人喺家中一隅嘅陳列櫃收藏細緻標本及文物，其後「藏珍閣珍奇櫃」仲演變成一門藝術學科。今次展出嘅珍品由自然科學到大自然藝術包羅萬有，其中由法國著名嘅戴羅勒標本屋及巴黎高科農業學院生命科學博物館借出嘅奇珍異寶最引人入勝。
阮偉文屋企都有「藏珍閣」
法國五月董事局主席阮偉文、愛沙尼亞共和國駐港名譽領事林建康同太太林黃寧艷拍住去探秘，三人老友鬼鬼，有講有笑。林建康睇睇吓，爆料話阮偉文屋企都有個飾櫃十足「藏珍閣」咁，夠晒奇異。阮偉文就謙稱係「垃圾」啫，其實係多年來旅行買落嘅紀念品，有貝殼、瓷器、銀器、象牙、木雕同珊瑚等等，佢笑稱買時好爽手，帶返屋企先知唔知點樣擺。不過呢一日睇過展覽後，先知咁冇章法嘅角落頭原來有名堂，可以叫做「藏珍閣」喎！
喺新加坡長大嘅林黃寧艷話，細個都有捉蝴蝶做標本，當時好興放喺書本內頁。講開親親大自然嘅童年，開心回憶返晒嚟，佢仲記得經常捉色彩鮮艷嘅瓢蟲放喺手背上欣賞，諗起仍覺好靚。
卓妮