政情：人口老化嚴重 丘璟珊撐自願醫保
鑑於醫療人手不足，喺香港睇公立醫院成日都要排長龍，有見及此，政府早前公布自願醫保計劃，鼓勵多啲市民用私家醫院，但對於計劃細節好多人都唔清楚，所以金紫荊女企業家協會日前就邀請咗食物及衞生局局長陳肇始嚟演講，向該會會員講解計劃詳情。該會主席丘璟珊話香港人口老化問題嚴重，佢嫲嫲都成一百一十歲先過身，所以政府有計劃幫更多市民用到好啲嘅醫療服務，當然係好事啦！
非強制 唔怕醫院唔受理
丘璟珊仲話計劃有一個好處，就係非強制性，因為美國、新加坡等要強制性買醫保，搞到有啲人冇買醫保就畀醫院拒諸門外，非強制性就可以避免呢類情況喇。
咁擔唔擔心有啲市民，例如高危嘅長者喺計劃入面受惠唔到？丘璟珊就話保險公司始終要賺錢，所以有啲範圍未能夠照顧到都可以理解，呢啲市民可能要用住公立醫院嘅服務先，等計劃落實咗之後再作調整，到時就可以逐步增加受惠嘅市民喇！