政情：陳健波向高官教路 錯要認 打要企定

掉轉身份思考 講大話一定死

波哥話，當日由政務司司長張建宗做主持，出席嘅官員有唔少係署長級以上，運輸及房屋局局長陳帆、民政事務局局長劉江華同保安局局長李家超都有出席。波哥教啲官，議員監察官員係天職，官員唔應該心中有氣，應該解釋政策講得好好睇睇，簡單易明，小朋友都理解到，如果掉轉身份，你自己係議員都唔收貨，啲議員又點會接受呢？而且錯就要認，打就要企定，錯就唔使死嘅，但係講大話就一定死，唔可以掩飾，唔好畀人覺得「死雞撐飯蓋」。

咁應該點答問題呢？波哥同班官員講答嘅時候唔可以心虛咁「咿咿哦哦」，唔好遊花園，如果政策係咁就要講清楚，如果手上冇資料就應該後補，唔可以淨係重複「標準答案」，要準備充足啲，若有項目要超支，就要講埋點樣解決，日後點樣預防，如果申請開設職位，就要講清楚係做乜，同以往嘅職位有咩唔同，亦應該畀多啲技術官員答問題，因為佢哋最清楚政策。波哥仲即場播咗段片做例子，嗰段片係發展局常任秘書長甯漢豪近日答議員朱凱廸問題，答到令朱凱廸收回問題。

去到議會唔應該諗個人榮辱

波哥又語重心長咁講，官員去到議會，就唔係代表自己，而係代表成個政府，唔應該諗個人榮辱，應該諗喺市民心目中會「得分定失分」，唔同議員有唔同「習性」，有啲係專家型，有啲就惡形惡相咁，應該預備好點應對，總括而言，就係要答得對題、準備充足，要知己知彼，態度要不卑不亢。佢又講起，政府團隊唔好有人諗住「唔做就唔錯」，以土地房屋供應不足係受程序影響做例子，如果規例唔合時，係咪應該檢討吓點改呢？

講真嗰句，波哥句句都係從政者基本要知道嘅事，但係啲官竟然咁都做唔到，依家竟然要議員教，諗起啲官唔少月薪都六位數字，真係想叫佢哋回水呀！