中環出更：游蕙禎指殺街有陰謀 為篩選表演者鋪路
油尖旺區議會上周大會通過「殺街」，要求政府研究取消旺角西洋菜街行人專用區嘅動議，有指政府需要四個月研究跟進，面對「殺街」一事似乎如箭在弦，青年新政游蕙禎尋日喺Facebook撰文，質疑政府目標唔係「一條半條小小的西洋菜街」，而係其他休憩場所同屋邨公園，未來或就街頭表演「發牌」，「篩選」表演者。
炮轟政府用民意掩飾
游蕙禎話作為當區居民，太清楚街坊面對嘅困境，佢認為街頭表演者、居民同警方之間嘅角力同矛盾，冇因為取消行人專用區而消失。佢又批評，警方對表演者當眾索取打賞行乞怠於執法，直接促成「殺街」結果。
游蕙禎認為，居民嘅意願從來都唔係要趕絕表演空間，反而係政府有意令居民狹小嘅生存空間同表演空間產生直接衝突，「將居民放上枱」，並以「民意」作掩飾，達至「殺街」之效。佢又預言，政府將來或會對街頭表演發牌並收取表演者費用，「篩選」表演者，甚至或會關閉部分休憩用地，或設時段限制喎。
卓妮