中環出更：貓眼黑超配膠手袋 麥瑞琼追透視潮流
尋日喺一個國際新生代設計師巡演活動上，見到享受緊退休生活嘅香港零售管理協會前主席麥瑞琼，佢戴住一副貓眼黑超、配襯斜孭膠袋，加上深入民心嘅超短髮型，成個潮人打扮咁去睇時裝表演。佢笑笑口話潮流興透視，好似膠雨褸、膠水靴同膠手袋咁，所以佢都唔執輸買咗個膠手袋，一於膠埋一份喇！
麥瑞琼笑稱好鍾意睇時裝雜誌，每個月都會追睇，自有一套扮靚心得。佢形容自己身高唔高、塊面又細，市面啲太陽眼鏡又大又重唔啱戴，早前難得見到呢副貓眼黑超夠晒輕盈，鏡片又細，好似為佢度身訂造咁。
活動嘅主辦機構揀選咗內地、香港、冰島、巴拿馬同坦桑尼亞等多位年輕設計師，以一帶一路為元素設計時裝進行巡演，六月起將分別到冰島、巴拿馬、坦桑尼亞及珠海巡演，希望藉此為設計師提供展示創作力嘅平台，促進跨國交流同共融。
香港設計師余嫿、任銘暉都有份獲選參加巡演，余嫿話好期待去冰島，因為從未去過，今次可以寓工作於娛樂喇！
馬偉明：港府埋沒設計人才
到場欣賞巡演時裝騷嘅仲有商務及經濟發展局副局長陳百里、著名設計師馬偉明、香港婦協名譽會長華慧娜等人，問到馬偉明對邊個一帶一路沿線國家嘅服裝印象最深刻，佢竟然話係香港，事關香港有好多人才。佢話鋒一轉，批評港府仍未有一個類似韓國東大門嘅時裝匯集地，畀設計師有一個可以展示設計成果嘅地方，咁樣埋沒咗好多人才喎。
卓妮