政情：收料站：李美嫦放大假 似更上一層樓
康樂及文化事務署（康文署）署長李美嫦上周六出席立法會，回應立法會政府帳目委員會就前身為堆填區的葵涌公園拖足十七年仍未開放事件，據悉李美嫦盡力拆彈解畫後，將於本周四開始休假一個月，期間會由康文署兩名副署長李碧茜同吳志華一同署任其職務。李美嫦突然放一個月大假，莫非背後另有玄機？
拭目以待下個落腳地
李美嫦喺一九八八年加入政務職系，由二○一四年七月開始出任康文署署長至今，約四年時間，並於二○一六年中坐正首長級第六級（D6），有官場中人指，李美嫦工作表現一直唔錯，而今次放一個月大假，事前聽聞已同轄下部門同事食飯，加上官場向來有不成文慣例，政務官每三、四年就會調職至新崗位，多個迹象顯示，李美嫦甚有可能更上一層樓，究竟佢下一個落腳地係邊個政策局，大家就要拭目以待！
至於今年二月先接任政府新聞處處長嘅朱曼鈴，前日開始放大假，據知佢舊年先升正D6，除非佢坐上官場「白金直升機」，一般相信，佢只係正常休假抖抖，然後再為工作搏殺。