政情：毛婆拉布語無倫次 讚水務署標誌
觀塘海濱音樂噴泉同灣仔摩頓臺活動中心因為有爭議，所以傾咗四、五年都仲未搞掂，立法會工務小組委員會尋日又再商議呢兩個項目，但泛民似乎就唔想呢兩個項目通過，喺前面嘅一個議程，即係傾緊地下雨水渠修復工程時拉布，特別係人稱「毛婆」嘅議會陣線議員毛孟靜，發言次數多之餘，仲講到有啲語無倫次，連水務署個標誌都讚番一輪！
唔知係咪因為要拉太耐冇嘢好講，毛婆除咗讚水務署個標誌，又話自己參觀水務署同渠務署時「impressive（令人讚嘆）到震」，仲摷番啲舊嘢嚟講，例如問及「新工程合約」意思，但就畀委員會主席盧偉國閘住，話「新工程合約」已經解釋過好多次，仲叫佢問番關於相關工程嘅問題。毛婆其後仲重複多次話唔明白政府嘅文字，想再發言，但盧偉國就叫佢喺會後自己搵番政府官員補補課咁話！
聽咗咁耐，民建聯嘅議員劉國勳都忍唔住發言，雖然冇開名，但言論明顯係針對毛婆，話佢哋就算唔想傾觀塘海濱音樂噴泉同灣仔摩頓臺活動中心兩個項目，都應該喺傾嘅時候表達意見，而唔係不斷問啲自己都唔知問緊乜嘅問題咁話！