政情：馬逢國髮Gel風波被飛起冇得查峯鴿
話說民主黨（白鴿黨）立法會議員許智峯（峯鴿）上月喺立法會大樓內，強搶保安局女行政主任手機，內務委員會將會成立調查委員會作出跟進。不過，原本係委員會主席大熱人選嘅馬逢國近日卻身陷「髮Gel風波」，搞到臨門一腳撻Q，唔單止失主席位，連加入委員會嘅機會都無埋，重責落入重返議會無耐嘅建築、測量、都市規劃及園境界議員謝偉銓。
早前有議員就「峯搶手機」一事提出譴責動議，立法會需要成立一個由七名議員組成嘅調查委員會作調查，再交報告畀大會進行表決，只要獲得在席三分二議員贊成就能夠通過罷免峯鴿。決定提出譴責動議初期，議員梁美芬成為調查委員會主席大熱人選，佢更表示持開放態度，願意幫手咁話，但近日就大改口風。有建制派人士話梁美芬之前已擔任調查熱血公民議員鄭松泰倒插五星旗同國旗嘅委員會主席，有聲音認為要將機會平分畀其他人試吓，所以馬逢國就接棒做咗主席人選，而梁美芬則唔加入委員會。
稱與近日事件無關 謝偉銓頂上
但人算不如天算，馬逢國被點中做主席嘅同時，佢就鬧出醜聞，搞到佢由主動向建制派話有興趣變成耍手擰頭，而佢尋日接受查詢時話明對加入調查委員會興趣唔大，又重申同近日事件無關喎。老實講，醜聞纏身又的確好難企喺道德高地批評他人，所以馬逢國所屬嘅「六人組」決定換人加入今次調查委員會都不無道理，而呢位最新人選就係謝偉銓。
建制派想麥美娟做委員會主席
謝偉銓重返議會至今未夠三個月，但建制派仍然對佢抱有信心，因為上屆立法會雖無成立過調查委員會，但都有兩個專責委員會，分別係調查前廉政專員「貪湯」湯顯明同高鐵工程延誤，而謝偉銓就兩個委員會都加入晒，其中更係調查高鐵工程延誤嘅副主席，所以有建制派直言佢夠晒經驗，而謝偉銓都表明有興趣加入咁話。
之不過，謝偉銓臨時上陣，並唔代表要代埋馬逢國做主席，事關建制派有意見認為，今次事件係峯鴿蝦女性，由女性擔任主席較為合適。其中麥美娟更曾多番公開批評峯鴿行為侮辱女性，故屬意由佢做主席，但最終成事與否，就要視乎麥美娟嘅意願喇！