喺唔少人心目中，要成為一位人氣模特兒嘅話，唔單止要有樣有身材，仲要夠青春火辣先至得。不過咁諗就未免太過偏頗，事關每個男士嘅口味都唔同，青春美女固然吸引，但係熟女亦有其吸引之處，好似申羅熙就憑住成熟韻味喺南韓模特兒界佔有一席位。
有人話想成為一位人氣模特兒，最重要就係贏在起跑線，簡單嚟講就係趁年輕出道，理由係年輕貌美加火辣身材，極具吸引力。不過凡事冇絕對，好似申羅熙就係一個好例外，2014年以29歲之齡出道，雖然年紀唔輕，但卻憑住迷人嘅樣貌，同埋胸前一對巨乳嘅魔鬼級身材，加上一股女人味，令佢好快喺模特兒界彈起。點解申羅熙會選擇喺呢個年紀先入行呢？佢表示一直以嚟都冇諗住成為模特兒，畢業之後，就去咗一間模特兒事務所做行政工作，當時佢亦冇諗過成為其中一員。直至有一次，事務所一位攝影模特兒因臨時失場未能進行拍攝，而其他模特兒唔係離攝影工作室太遠，就係本身已經有工作安排嚟唔到，正當唔知點算嘅時候，攝影師便問申羅熙可唔可以頂替，之但係羅熙冇任何模特兒工作經驗，對於佢嚟講確實係一個相當大嘅挑戰，個心十五十六之際，最後佢便答應。佢估唔到拍攝出嚟嘅效果相當好，事後獲得極佳嘅評語，好多人都大讚佢外形迷人，令佢充滿自信又有滿足感，亦令佢開始萌生成為模特兒嘅念頭，於是決定兼職做模特兒試試水溫。
隨住申羅熙嘅知名度愈嚟愈高，工作亦愈嚟愈頻密，壓力大到令佢有種抖唔到氣嘅感覺，同公司商議後，佢決定放棄行政工作，以職業模特兒身份出道。申羅熙表示之所以有呢個決定，除咗係本身對模特兒工作有興趣外，亦因為佢想成為後輩嘅榜樣，唔單止可以顯示畀佢哋睇，作為一位職業模特兒應有嘅工作態度，同時亦希望可以話畀有模特兒夢想，卻又擔心年紀大嘅女士們知道，即使係熟齡出道，亦可以做出好成績出來。而成為職業模特兒後，首個工作並非係一直做開嘅攝影模特兒，反而係以賽車女郎身份喺釜山舉辦嘅賽事上登場，雖然初次喺大型活動上演出，但係演出經驗豐富及心智成熟嘅申羅熙，又點會難得到佢呢？成熟韻味加上火辣身材，配合超性感嘅貼身賽車女郎制服嘅襯托下，無比嘅魅力喺賽場上大放異彩，不但成為賽場上嘅焦點，同時令佢一炮而紅。之後，佢又以Show Girl身份喺國際遊艇展上登場，以高貴形象示人嘅佢，令大家發現佢除咗有陽光活力一面，仲有一份優雅嘅氣質，尤其係淡定嘅神情，更係令人一見難忘。雖然申羅熙極速喺賽車女郎及Show Girl界闖出名堂，但問到佢最鍾意邊種工作時，佢仍然覺得攝影模特兒工作最啱佢，理由好簡單，就係喺室內進行拍攝感覺會舒服啲，冇喺大型活動演出咁大壓力，而佢未來希望能夠繼續貫徹當初嘅目標，就係成為後輩眼中嘅榜樣。
出生地：首爾
身高：170cm
三圍：36-23-36
簡介：如果要問申羅熙最突出嘅地方，相信非激凸嘅上圍莫屬。雖然佢年屆熟齡才進軍模特兒界，但係佢唔單止樣貌迷人，豐滿嘅上圍更係極之吸引，不論穿着賽車女郎制服定貼身小背心，都能夠輕易成為男士嘅焦點。如果大家想了解佢多啲，就要Click入呢個網站喇！
網址：http://cafe.daum.net/shinraheeluv
撰文：魂