政情：鄧宣宏雁細個讀書最驚校長
好多人讀書時都好怕校長，保良局總理鄧宣宏雁（Emily）都唔例外，佢笑笑口自爆，細個喺家鄉雲南讀書時，最怕默書同考試，所以都好驚校長。不過早幾日Emily就同好多校長聚首一堂，仲有講有笑，原來佢牽頭促成保良局旗下多間學校同雲南嘅多間學校締結姊妹校，希望增進兩地嘅文化交流。
顏肇臻關注康樂活動發展
當日多名保良局董事局成員都有出席，包括啱啱加入做總理嘅「帽后」顏寶鈴大仔顏肇臻（Andrew）。Andrew話加入保良局之後，特別關注小朋友嘅康樂活動發展，佢喺美國讀過書，覺得香港太重視讀書，欠缺聯校活動等全面發展，今次同雲南方面建立姊妹校關係，可望透過比賽等多種形式加深彼此了解。
同場仲有雲南省教育考察團多名成員，保良局胡忠中學校長曾建強都有到場，原來Emily身兼該校校監同校管會主席，難怪大家講起教育話題啱晒嘴形喇！