政情：范國威 區諾軒同住「選手村」
新同盟立法會議員范國威（Gary）同區諾軒同喺立法會補選中當選成為議員。佢哋兩個原來有唔少共通點，包括兩人都曾經係民主黨（白鴿黨）黨員，亦都擔任過民間人權陣線召集人，而佢哋都係退出白鴿黨之後，先擔任立法會議員。Gary就話佢哋兩個仲有另一個共通點，就係住埋一齊。唔好諗錯隔籬，Gary係講住埋同一個屋苑啫，而呢個屋苑仲出咗兩個立法會議員同五個區議員添！區諾軒就笑言，呢個屋苑簡直係「選手村」喎。
兩人有好多相似之處
Gary同區諾軒指嘅「選手村」就係將軍澳唐明苑，除咗出咗身兼西貢區議員嘅Gary同本身係南區區議員嘅區諾軒，仲有前西貢區議員張國強、深水埗區議員何啟明同江貴生，而佢哋全部都係民主派嘅議員。不過，區諾軒依家已經搬離咗唐明苑，佢同Gary冇再「住埋」喇。
Gary又話，唔少人都覺得佢同區諾軒有相似之處，甚至以為佢哋年紀都差唔多，其實Gary五十一歲喇，而區諾軒作為立法會現時最後生嘅議員，只係三十一歲咋，兩人相差廿歲。係Gary保養得宜，定係區諾軒太成熟，就大家自行判斷喇！