中環出更：印刷科技化 彭安琪：係挑戰亦係機會
唔想畀科技潮流淘汰，就要識得運用科技。香港印刷業商會（商會）尋日就將一批香港知專設計學院畢業生嘅創意畫作，致送畀十八區區議會。呢批描繪各區特色嘅畫作雖然係按原作印刷，但內裏就蘊藏「擴增實境」(Augmented Reality，簡稱AR)技術，只要用安裝嘅相關應用程式嘅手機嚟睇，本來靜止嘅畫面就會以動畫嘅形式喺屏幕上呈現。商會嘅印刷科技研究中心總監彭安琪（Brenda）話，現今印刷業好講究科技。
Brenda話坊間認為印刷係一門夕陽行業，其實科技對印刷業既係挑戰，亦係一個與時並進嘅機會，業界嘗試利用多元媒體嚟擴展印刷品嘅應用範圍，例如產品目錄應用擴增實境，顧客喺印刷品上既可見到產品圖像，亦可透過手機得到更多資訊，而按量印製技術嘅發展，就算單件印刷亦可應付，既省卻過量印刷嘅煩惱，又利於個人化嘅發揮。
大豆油製墨 趙國柱唔介意食啖
印刷業要同科技結合，就需要相關嘅人才。商會會長趙國柱話投身印刷業嘅新血較少，可能係大眾對印刷業仍有一種滿手油墨，工作環境瀰漫難聞氣味同噪音嘅印象有關，但其實隨着時代演進，環保要求日漸提高，今日印刷機械嘅噪音已大幅下降，氣味方面亦因非石油類嘅油墨得到普遍採用，從而大有改善。趙國柱話其中有一種採用大豆油做原料嘅油墨，唔介意嘅話就算食一啖亦無妨咁話。
商會總幹事張穎貽就話科技發展，紙張已非印刷嘅主要介面，好多種材質譬如磚面，亦可以隨意印上花紋圖案，不再局限喺紙張嘅印刷業界可謂無處不在，所以印刷業並非步向夕陽，而係朝陽行業至啱。
卓妮