老牌政黨民協近年不斷畀民主黨（白鴿黨）撬走樁腳，再加上喺立法會零議席，以及最近嘅立法會補選出現「屈基（馮檢基）」事件，未來發展路向可謂舉步維艱。補選落幕後，民協總動員遠赴台灣高雄舉行退修營，商討未來路向，最終決定要民協進行「現代化」改革。
據悉，每屆立法會選舉後，民協都會舉行退修營，但二○一六年換屆後發生好多事，好似宣誓風波、修改《議事規則》、高鐵一地兩檢等，所以改到今年三月底先出發。民協副主席兼深水埗區議員何啟明話，退修營期間去咗向當地立法委員團隊取經，黨友又討論好多未來發展，包括想用「現代化」方法發展民協。
對於另一副主席楊彧曾經講過「政治係票房毒藥」，何啟明就話，退修營內大家都有討論過，正解係政治與民生密不可分，想用民生去說服選民支持民主。至於民協會唔會合併入白鴿黨，何啟明承認以前討論過，但今次無再討論，未來會主力做好黨改革。民協正招聘新人主打網絡，做社交媒體，何啟明笑稱，真係要搞搞佢，自己個Facebook永遠都係「攞你命三千」，得咁少人唔係好掂囉。