政情：謝曉瑩嘆戲服刺繡瀕失傳
機械嘅生產效率無疑係高，但文化工藝係機械未必取代得到。粵劇才女謝曉瑩尋日出席中國旗袍協會香港總會活動，佢所着嘅旗袍同好多粵劇戲服一樣，都有精美嘅刺繡圖案。講起粵劇戲服，謝曉瑩就話，雖然依家多咗人重視粵劇，但製作戲服嘅師傅就愈來愈少，而識得為戲服刺繡圖案嘅「繡娘」，大多邁入古稀之年，傳統手藝瀕臨失傳。
機械繡鳳凰效果似隻雞
謝曉瑩話，戲服上嘅刺繡始終要靠人手一針一線先至顯出神韻。不過製作戲服嘅「繡娘」雖有精湛手藝，但已高齡體弱，江蘇年前一個隆冬，已經有幾位離世。佢又話，因為傳統手藝瀕臨失傳，依家要刺繡圖案往往都會用到機械，但始終都只得外形而欠神髓，更見過以機械刺繡嘅鳳凰圖案，效果睇起嚟似隻鷄多啲。
靚戲服價值不菲，真係要好好保存。謝曉瑩就話，為免貴重嘅戲服被汗水沾濕，演員要靠穿着內衣來吸收汗水。佢仲話，粵劇演員都視戲服為家當，就算污糟咗，頂多都只係局部清理，唔會成件清洗咁話。