政情：唐英年又甩轆 復旦校訓掉轉讀
前政務司司長唐英年一向都「金句」多多，出席活動致詞演講都試過唔少次「甩轆」。尋日佢出席上海復旦大學香港校友會論壇時又再創「新猷」，竟然將復旦校訓掉轉嚟讀，仲要懵然不知，真係(火羅)爆。
現場傳出笑聲
唐英年尋日出席復旦大學香港校友會論壇，佢致詞時望向一面掛有復旦校徽嘅旗幟，上面仲有該校校訓。唐英年想引用該校校訓時，就將人哋由右向左寫嘅校訓「博學而篤志，切問而近思」掉轉咗嚟讀，結果變成「思近而問切，志篤而學博」。據稱現場即時傳出一陣笑聲，但唐英年並冇即時糾正，似乎並唔知道自己已經出洋相。
唐英年過往多次喺公開場合失言，例如「昂坪360」纜車開幕時，將「昂坪360」中嘅「360」英文講成「三碌拎」，又試過出席立法會會議時將被迫搬遷嘅酒店住客形容為「條條揈喺街度」，真係貽笑大方。