政情：區選前哨戰 李梓敬擴版圖 龐朝輝倒戈
區議會換屆選舉明年底舉行，但唔同政治陣營已調兵遣將展開前哨戰。自由黨一直想擴大地區勢力版圖，增加區議員數目，據悉該黨嘅深水埗區議員李梓敬想幫黨內青年團團長張景勛進身區議會，並打算搶攻九龍城區議會德朗新選區。不過，早前因為醫務委員會改革爭拗憤而退出自由黨嘅眼科醫生龐朝輝，亦有意落德朗新選區參選，意味倒戈相向，為自由黨開拓地區版圖之路造成障礙。
二○一六年深水埗區議會主席爭奪戰，張永森憑李梓敬嘅一票支持，險勝民協譚國僑當上主席。有消息指當時張永森曾經向李梓敬放風，指會做埋今屆區議會就退休，願讓出其美孚北嘅議席予自由黨，從而換來李梓敬嘅關鍵一票。事實上，張永森喺一六年底曾因大病請假，期間未能出席區議會大會，健康情況令人憂慮，故李梓敬早已搵定張景勛準備接手美孚北議席。
新舊黨員插旗爭位戰
不過，最新消息指張永森改變心意積極考慮爭取連任，張景勛接棒夢頓成泡影，李梓敬於是建議張景勛轉戰九龍城區議會嘅德朗新選區。目前德朗邨屬於啟德南選區，現任區議員係經民聯何華漢，由於人口增加，將新設一個德朗新選區，於是成為張景勛嘅新目標，亦早已落區開荒。正所謂塊田「耕開就有人爭」，最近傳出龐朝輝有意殺落德朗新選區參選，演變成自由黨新舊黨員「插旗」爭位戰。
龐朝輝係眼科醫生同醫學會會董，亦係上屆灣仔區議員，佢出身醫護世家，爸爸係牙醫龐可榮，媽媽係曾多次參選立法會衞生服務界選舉嘅護士龐曹聖玉。龐朝輝近年喺醫務委員會改革一事上，同自由黨主席張宇人公開「互片」爭拗，最終喺去年七月退黨收場，上月更轉投經民聯，沒料到佢積極考慮挑戰嘅德朗新選區，竟然「冤家路窄」遇到前黨友。
撐張景勛出選有難度
李梓敬接受查詢時證實張景勛近期已到德朗新選區展開地區工作，至於係咪參選就「十畫都未有一撇」，但佢會全力支持。至於龐朝輝亦承認目前正喺德朗做地區工作，但出選與否，要視乎黨嘅安排，又相信建制派內部會協調部署。其實啟德新區早已被經民聯「插旗」，已攻佔啟德南及啟德北兩議席，所以李梓敬想幫張景勛喺呢區爭一議席，難度都唔細，況且仲要經過建制派內部協調後先至可以出選，可謂重重障礙。