中環出更：公司條例委員會名單 民主派冇影
立法會新成立嘅《二○一八年公司（修訂）條例草案》委員會委員名單已出爐，共有四名議員要求加入，包括李慧琼、何君堯、金融服務界張華峰及金融界陳振英，全部都係建制派議員，民主派議員就冇晒影。不過，今次修訂條例有好多內容都同會計相關，包括擴大簡明財務報表嘅涵蓋範圍等。會計界議員梁繼昌就承認「蝦碌」，唔記得咗報名，喺月底嘅首次會議會補鑊申請加入番委員會。
梁繼昌冇留意截止報名日
梁繼昌回覆查詢時，表現得驚訝，聲言知道有一個相關委員會，但就冇留意到截止報名日期。佢又話，目前同時參加咗四至五個唔同嘅草案委員會，有啲更擔任主席或副主席，所以都算有啲忙，今次加入都唔會再做主席o架喇。問到咁多嘢都係同會計相關，對業界會唔會好咗？佢就話，香港係金融中心都正常嘅，但如果政府做好啲，唔使等議員提醒再做修訂，唔使來來回回搞咁耐就最好嘞。
卓妮