中環出更：細個雪糕當早餐 區海倫急儲健康防老
港安醫院慈善基金早前舉行慈善午宴，為轄下嘅癌病基金籌款，以幫助有經濟困難嘅癌病患者進行免費掃描、診斷同治療。講起健康話題，考試及評核局主席陳仲尼太太區海倫（Helen）笑笑口話，年紀漸長先知道要「儲健康」， 到老時先至有得使，自己後生時唔識呢個道理，仲試過食兩杯雪糕做早餐添！
Helen話，依家手機成日都收到朋友分享嘅養生貼士，睇得多，所以都開始注重養生。最近佢就自覺面色唔好，朋友話可能係肝有毒素，所以佢依家食嘢都小心啲，例如朝朝飲薑水，夜晚瞓覺前就飲杞子水補眼。至於老公陳仲尼朝早就會飲熱檸水，同埋食多啲鹼性食物。
同場仲有名人周國豐太太黃泳霖、品格教育協會創辦人劉馬露明及保良局總理廖偉芬等人，基金主席蘇瑋愉及理事會成員查陳愛茵就忙住招呼賓客。午宴除咗籌款之外，亦趁機頒發八個獎項以表揚女性為社會作出嘅卓越貢獻。劉馬露明坐定定聽得獎者分享助人抗癌嘅故事，笑稱發現原來自己嘅生活習慣唔係咁健康，睇嚟要做多啲運動至得。不過佢老公係醫生，就算幾唔健康都有個譜。
廖偉芬咖啡店計劃上市
今時今日女性都有自己一番事業，廖偉芬幾年前創立嘅連鎖咖啡店生意都唔錯，唔止衝出香港，仲籌備緊上市添。不過佢就話，開咖啡店係做生活品味生意，點知做做吓就做埋廠，事關為咗控制品質，佢哋喺香港設埋廠自炒咖啡豆。而黃泳霖最近都搞緊一個房地產基金，主要投資中國同日本，既要照顧一對仔，又要做生意，真係唔簡單。
卓妮