政情：民主黨成籮醜聞 乳鴿擬戰何君堯 隨時變炮灰

法律背景落區 圖收復AV仁失地

喺一五年嘅區議會選舉中，AV仁被何君堯同熱血公民嘅鄭松泰左右夾擊下，以三百票之差「陣亡」。不過，何君堯進身立法會後先捲入「執業風波」，宣稱自己係英國同新加坡「執業律師」，卻被爆無喺兩地正式執業，後來又發表主張港獨者「殺無赦」嘅言論，惹起好大爭議，白鴿黨可能吼準何君堯呢啲負面事件，想喺下屆區議會選舉翻盤。

至於乳鴿Cary本身係「JR團隊」召集人，最早出名係曾經就政府決定喺西九文化區興建故宮博物館申請司法覆核，喺今年一月先正式加入白鴿黨。Cary本科喺中大讀經濟，正職係銀行法規部調查主任，佢笑稱工作就好似銀行界嘅ICAC（廉政公署），睇吓有冇人洗黑錢等。而佢已經讀咗一年法律碩士課程，將暫停一個學期至選完先再繼續。睇嚟佢以法律背景落區，諗住可以攞番身為律師嘅AV仁嘅票，兼且試搶何君堯嘅支持票。

有知情人士透露，Cary諗過度過，決定真係想參選區議會後，先揀定主打律師身份嘅何君堯做對手，及後經評估認為加入白鴿黨對其選情最有利，最後先入黨。佢目前掛單喺白鴿黨立法會議員尹兆堅（肥尹）位於屯門嘅議辦工作，據知Cary並唔係肥尹嘅「入室弟子」，兩人純粹係「合作夥伴」。

講番轉頭，白鴿黨醜聞不絕，現被凍結黨籍嘅立法會議員許智峯涉搶保安局女行政主任手機，早已惹來各界批評同指摘，舊年年底更爆出黨員林子健涉虛報被擄走等，真係「鑊鑊新鮮鑊鑊甘」，喺選舉期間勢必被翻舊帳，乳鴿未發圍就被圍攻喇！