中環出更：游蕙禎着唐服 自己友Fb掀「罵戰」
青年新政游蕙禎失去立法會議員資格後，佢嘅動向仍受到各界關注，包括早前盛傳佢有新男友都成為城中熱話。尋日適逢係游蕙禎廿七歲生日，但未見佢喺Facebook放閃，反而見到佢早幾日換咗頭像，身穿唐服嘅佢有一種古典美，但就疑似引發網民罵戰，有人留言指斥「支那禎」唔認自己係中國人，但又走去着唐裝喎。
袁健恩用簡體字留言扮「鬧」
一位名叫「袁健恩」嘅男子喺Fb留言，仲連番用簡體字去「鬧」游蕙禎，另有網民就指斥袁健恩千祈唔好着西裝，唔係就會變「西人」。雙方不斷以「Hashtag」留言互罵，游蕙禎更自嘲唔識文化唔好着。最後連九龍城區議員鄺葆賢都留言出聲，話袁健恩：「連做五毛都Fail（失敗）。」
其實呢位袁健恩同游蕙禎都算老友，之前立法會九龍西補選，曾一度傳出袁係游嘅Plan B，只係最後無出選。眼見罵戰好似愈鬧愈認真，袁健恩都急補鑊喺留言貼番張佢同游蕙禎嘅合照，證明輯相就係出自佢手筆，「鬧」完一輪原來只係一場鬧劇。
卓妮