中環出更：鄉郊發展再生能源 劉業強撐善用農地
最近政府提出「上網電價」，鼓勵市民安裝太陽能板或風力系統，令香港可以有更多可再生能源。新界鄉議局早前已表態支持，主席劉業強尋日喺沙田馬場出席鄉議局盃時話等緊政府交代有關細節，因為鄉郊村屋採光較好，稱得上係最適合安裝太陽能板嘅地方，仲話有啲村民都試過整有關系統，但鑑於過往技術較差，效益唔係太好，加上未有政府支持所以難以實行，如今有政府推動相信可以更完善。佢仲話未來甚至可以善用一啲荒廢咗嘅農地、水塘等，睇吓可唔可以用嚟發展可再生能源。
講起太陽能板，離島區議會副主席余漢坤就話佢舊年已經同世界自然基金會合作過，喺三間大澳棚屋試行太陽能供電，效果相當好，有照明之餘仲有多餘電力畀住戶用，所以即使村屋嘅結構同棚屋有啲唔同，成本可能較高，但都應該向呢一個方向發展，呼籲政府快啲搞清楚啲條例細節咁話。
容海恩首嘗拉頭馬滋味
但喺村屋安裝太陽能板嘅話，怕唔怕畀人話係僭建？上水鄉事委員會主席侯志強就話呢個明顯係推動環保嘅措施，係利民嘅好政策，絕對唔係僭建，但佢都認為政府應該先傾清楚一啲細節，例如喺天台安裝太陽能板嘅高度，佢覺得大概兩米至兩米半最為合適，一方面可以畀村民晾衫、乘涼，亦唔會太高影響建築結構，咁就係最理想喇！
另外，鮮有出席馬場活動嘅新民黨立法會議員容海恩（Eunice）都有同場，仲有份拉頭馬，原來係佢黨友王家揚嘅朋友隻愛駒贏咗，知道Eunice喺附近就叫埋佢嚟，Eunice話今次係佢首次拉頭馬，都好開心。
卓妮