政情：連續兩年黨慶撞期 葉劉話下次要夾吓
新民黨尋日舉行七周年黨慶晚宴，雖然都有政商界名人出席，不過就唔多見民主派人士同議員出席。原來新民黨同公民黨嘅黨慶撞埋同一日，仲要係連續第二年「撞到應」，難怪新民黨主席葉劉淑儀（葉太）都話，下年要同對方「夾一夾」喇。
議員影完相就趕去開會
除咗避免撞期，搞晚宴等活動都要考慮埋立法會檔期，好似尋日係星期五，就撞正立法會財務委員會恒常會議，多名建制派議員到咗一陣，影咗幾幅相，就要趕返立法會開會，十分頻撲。搞到葉太都話，星期五搞活動真係唔太理想，下年要揀個好日子，方便官員同議員咁話。
此外，新民黨副主席容海恩（Eunice）尋晚再次展露歌喉，唱咗首《深愛著你》，仲話希望政府可以畀多啲資源幫新民黨。
葉太之後就解釋話，佢哋唔係叫政府捐錢，而係希望當局能夠設立「政策研究培訓基金」，畀本地政黨或智庫申請資金，以作研究經費喎。