政情:四點鐘許Sir任PTU檢閱官 經典對白重現

因主持警隊記者會爆紅嘅「四點鐘許Sir」警務處助理處長(資訊系統)許鎮德下個月就退休,尋日就由佢主持西九龍總區機動部隊Yankee大隊結業會操檢閱儀式,大會仲特登安排咗會操喺正四點鐘舉行,真係襯晒佢,連許Sir致詞嘅時候都話:「會操喺四點鐘舉行,對我嚟講實在係感受至深。」

下月退休 三點寄語同袍

許Sir仲不忘喺致詞尾聲,拋出一句深入民心嘅經典對白:「I will now recap in English」,現場個個都拍爛手掌。原來許Sir已經喺警隊服務咗三十一年,經歷過唔少難忘驚險事,包括一九九二年大角咀利得街槍擊案,同埋旺角砵蘭街麻雀館劫案,而二○一四年處理非法佔領活動嘅工作,就深深體會同事所面對嘅困難及苦況。

許Sir仲有三點寄語PTU成員︰第一,需體現「一隊齊心,克盡己任」格言;第二「天行健,君子以自強不息」;第三,做警察係個人一份「榮譽」、係對社會嘅一份「使命」、對警隊及同事所信守嘅一份「忠誠」。

第一手消息請下載on.cc東網iPhone/iPad/Android/Windows Phone Apps