政情：陳家強獲委任競委會委員
競爭事務委員會即將換屆，並將會有九個新面孔加入，而九個新面孔當中都有部分並唔陌生，其中一個就係財經事務及庫務局前局長陳家強。陳家強以前都做過消費者委員會主席，而競委會同消委會都有一個共通點，就係保障消費者。唔知呢個係唔係陳家強被委任為競委會委員嘅原因呢？
下月上任為期兩年
陳家強喺去年六月底，卸下局長職務離開政府之後，就重返「娘家」香港科技大學商學院教書，而尋日佢就被政府委任為競委會新成員，下月一日上任，任期為兩年。而競委會其他新成員就包括陳佩君、巢國明、郭榮鏗、林欣琪、雷紹麟、伍俊達、黃幸怡同翁錦輝。
除此之外，競委會主席胡紅玉就繼續連任主席一職，而現任嘅多名成員包括陳國威、陳瑞娟、鄭建韓、鄭國漢、郭珮芳、梁君彥、黃鳳嫺同黃傑龍就將會卸任喇。