政情：審議預算案 梁君彥辣手剪布 玩殘泛民

削減逾七成修正案

今年議員就預算案提出嘅擬議修正案總共有二百三十項，分別由十五名議員提出，全數為民主派。提出最多修正案嘅依次為議員朱凱廸、陳志全（慢必）及區諾軒，三人分別提出九十四項、六十項及四十八項，但最後獲批嘅修正案就分別只有六項、十四項及三十一項。而喺十五名提出修正案嘅議員之中，只有教育界議員葉建源一項都唔批，因為佢提出錯誤修訂。

梁君彥在裁決中話，雖然今年嘅修正案已經係近五年最少，但數量仍好多，立法會主席須行使權力，確保立法會事務得以有序、有效及公平處理。而佢今次就採用咗「一目多項」原則去裁決，即一個分目只可以提一個修正案；如同一分目有多於一項修正案，就只可提出建議削減最大款額嘅修正案；若秘書處就削減最大款額嘅相同修正案接獲多於一項預告，就要「先到先得」，由最早預告嘅議員動議有關修正案，而主席亦會運用酌情權，決定議員可否提出修正案。

最後梁君彥裁定有廿五個修正案屬不準確，唔可以提出，但就揀咗其中五十五項修正案可以提出，另酌情批准十項修正案。佢又聲稱，雖然今年採用「選擇準則」，但獲批嘅修正案佔提交數目兩成八，比例已較二○一五、一六及一七年為高，認為唔會削弱議員辯論權利，仲明言希望用多約三十八小時審議、於下月十日就可以完成預算案三讀添！

對於梁君彥再次出「利剪」剪布，慢必就批評梁喺修改《議事規則》後再次收緊議員提交修正案嘅準則，目的就係減少修正案數目，令預算案辯論時間減少，但佢直言修規後已好難「上訴」。睇嚟民主派喺預算案拉布都好難再玩出花樣喇。