中環出更：李永達九日三會漢奸黎 疑密斟度橋撐黑社會
民主黨（白鴿黨）立法會議員許智峯日前爆出強搶女官員手機醜聞，搞到白鴿黨要急急暫停佢黨籍止血。喺呢個關鍵敏感時刻，兩名白鴿黨元老前立法會議員李永達同何俊仁（AV仁），尋日中午竟然仲有餘閒到外號「漢奸黎」嘅壹傳媒黎智英屋企密會，唔通係為「峯搶手機」事件拆彈？其實今次已經係李永達喺最近短短九日內，第三度拜訪黎宅，峯搶事件係早幾日先發生，可見兩者未必有關連，反而令人懷疑係咪有人撐完白（鴿黨）又撐黑（社會），要密密見、密密斟，齊齊度橋撐某啲黑社會人士呢？
點解咁講呢？已年屆六十二歲、出名「矮仔多橋」嘅李永達，自輸完立法會又輸區議會選舉，淪為「雙失老年」之後，只能周圍「抓撈」，包括幫過多次收受漢奸黎秘密捐款嘅「民主阿婆」前政務司司長陳方安生打工，喺背後出謀獻策，興波作浪，反中亂港。
曾於網台為黑社會搖旗吶喊
不過，隨住民主阿婆近年「乾塘」，李永達再度失業並喪失僅餘嘅政治平台，惟有轉為喺網台亂噏當秘笈。日前佢就喺網台幫啲黑社會人士搖旗吶喊、打鑼打鼓，都唔知係咪收咗某啲人柯打，要佢故意抹黑他人。
尋日中午約十二時半，漢奸黎名下架七人車，又車咗幾名男子到達佢位於何文田嘅大宅。今次架車落晒簾，而且泊得好入，好似有啲不可告人嘅秘密，要特登唔畀人見到有咩人落車咁。
到大約下午二時五十分、即眾人密會超過兩個小時後，漢奸黎首先乘坐房車離開，直駛位於將軍澳嘅壹傳媒大樓。之後七人車亦駛離黎宅，坐喺車頭司機位旁嘅正係戴住黑超嘅李永達，遠睇頗有「黑社會feel」。
七人車首先喺中環放低AV仁，然後再駛往金鐘立法會。原來坐過監嘅社民連副主席黃浩銘都有參與今次密會，仲同李永達前後腳落車，雙雙步入立法會大樓。期間李永達仲撞到一名疑似壹傳媒記者，不避嫌向對方講：「去完你老細屋企食飯！」講起黃浩銘，佢嘅社民連黨友陶君行，近日亦有喺網台幫啲黑社會人士吶喊助威，真係好巧合囉！
卓妮