民主黨立法會議員許智峯（瘋鴿）前日朝早喺立法會搶走保安局女行政主任（EO）嘅手機，對方之後報警處理。事件愈鬧愈大，瘋鴿尋日下晝先肯就事件認衰致歉，但似乎悔意有限，皆因被問到事發經過，佢只係多次話「喺佢（EO）手上拎走佢手機，佢冇話同意嘅，做法係有唔啱」，隻口不提個「搶」字，唔通佢認為未經人哋同意就拎走人哋啲嘢，仲要匿埋入男廁等物主拎唔番，咁都唔係叫搶？擺明就係詭辯喇！
