政情：譚香文再退黨 前綫區議會失守
黃大仙區議員譚香文尋日喺社交網站發聲明公布，已經喺上星期五退出前綫。佢回覆話今次係佢第二次退出前綫，該組織近年已無政治活動同行動，希望退出，集中力量做好地區工作同會計界選委嘅工作，並相信前綫已無區議員。至於曾以前綫身份參選嘅立法會議員陳志全亦話已冇交幾年會費，當自己已經唔係前綫代表。
譚香文話今次退出已獲前綫召集人甄燊港接納，感謝甄燊港夫婦多年來對佢嘅支持同幫助，日後將以獨立民主派區議員身份繼續服務社區。佢又提到一六年人民力量堅持派譚得志到九龍東參選，逼走前綫，自己其時心灰意冷，覺得有人唔夠義氣。佢唔單止退出人民力量，亦有一段時間曾脫離前綫，其後喺甄燊港夫婦挽留下返去，但之後好少參與該組織嘅活動，依家正式退出，喺民主動力嘅區議會選舉協調中亦會申報為獨立。
譚香文喺○六年公民黨創黨時係成員之一，其後喺○九年退出公民黨，一三年加入前綫同人民力量，而喺一六年，包括譚香文在內嘅前綫退出人民力量。