政情：陳肇始甩底惹禍 徐德義淪炮灰

工務小組審議「十年醫院發展計劃」五個項目嘅撥款申請，包括廣華醫院、瑪麗醫院、葛量洪醫院同聖母醫院的重建工程，以及喺啟德發展區興建新急症醫院的工程，開支合共二百九十五億元。

柯創盛轟食衞局漠視民意

九龍東直選議員柯創盛（柯仔）發言時就開火，先代表黃大仙區議會強烈譴責食衞局完全漠視民意，反問當局「黃大仙（居民）係咪二等公民，唔配有急症服務？」佢又話過往同團隊多次到醫管局及食衞局示威，批評政府充耳不聞，唔明點解花一億九千多萬元重建聖母醫院，只能增加五十六張病床，而未能提升醫療服務。

柯仔仲話依家黃大仙居民叫救護車到醫院要五十分鐘，直言「（副）局長你都係醫生，點搞啊？」徐德義就解釋，啟德醫院、廣華醫院同聖母醫院屬於一個組合，三個項目完成後，九龍中聯網喺八年後預計會有一千張病床，當局亦會與消防處重組急症服務路線圖，務必喺最短時間送市民往急症室。之後有唔同議員狂轟徐德義。

雖然係陳肇始甩底惹嘅禍，搞到班議員咁「(興)」圍插徐德義，但徐德義之前亦係九龍東醫院聯網總監，其時未搞掂九東嘅醫療服務，或多或少都要負番啲責任。