政情：13發言議員「失蹤」 立會提早收工
立法會尋日開始就有關政府財政預算案嘅《二○一八年撥款條例草案》恢復二讀辯論。過往議員都會就預算案積極發言同提出修正案，但今年唔止修正案數目大幅減少，就連會上發言都疑似偷懶。尋日嘅會議原定朝早十一時開始，至晚上八時結束，惟至下午約四時，主席梁君彥（Andrew）突然宣布完會，會議要喺下周三先再繼續。究竟立法會點解開咗五小時會就突然提早收工﹖原來又係因為原本按咗發言按鈕嘅議員全部不在席，喺冇人發言下，Andrew惟有宣布休會。
僅19人就預算案發言
尋日會議結束之前原本係由議員范國威（Gary）就預算案發言，當時立法會直播顯示，排喺Gary之後仲有十三位議員排緊隊，依次為議員梁美芬、會計界梁繼昌（Kenneth）、田北辰同黃碧雲（一舊雲）等。Gary幾乎用盡限定發言時間嘅十五分鐘，到佢完成發言時，Andrew就問仲有冇議員發言。不過會議廳內除咗Gary同已發言嘅進出口界議員黃定光外，已經冇其他人喇！Andrew惟有宣布休會。其後議員鄭松泰同法律界郭榮鏗趕至，但都為時已晚。而尋日只有十九名議員已就預算案發言。
3議員稱開會趕唔切
Kenneth解釋，佢當時同土地供應專責小組主席黃遠輝喺立法會大樓辦公室開緊會，助理通知就快輪到佢發言時，佢已即刻趕番會議室，可惜已經趕唔切。一舊雲就話佢按發言按鈕時，前面明明有十多人排緊隊，預料到傍晚先輪到佢，所以就去咗開會，仲校埋鬧鐘打算提醒自己差唔多就好返回會議廳，點知咁快就輪到自己。佢又質疑Andrew點解唔點人數，叫議員返去開會喎。至於梁美芬都係開緊會，但佢喺Gary發言期間已通知要延遲發言。
預算案辯論因為冇人發言而搞到休會都係第一次，Andrew都話要同議員商量一下點收科。過往民主派多次就預算案拉布，但今次連發言都懶理，唔知今次Andrew會唔會乘機剪布呢？