中環出更：裝太陽能板撐環保 陳振彬話安全第一
政府早排公布「上網電價」計劃，市民安裝太陽能板同風力系統後，就可以將電賣番畀電力公司，以推動可再生能源發展。早前卓妮喺馬場見到唔少名人，佢哋都明言支持為環保出一分力，其中觀塘區議會主席陳振彬更話有安裝太陽能板嘅打算添！
陳振彬透露，鄰居早已經安裝咗太陽能板，而佢都好有興趣，但第一步要先搵咗合資格人士睇吓屋企先，因為屋企近海食風，為免打風時有危險一定要先搵積師評估，直言要安全第一。
現時政府指估計十年就可以回本，而陳振彬都作咗初步計算，但結果係十年毋須維修先可以回本喎，所以佢都話回本期仍係未知數囉。不過，佢強調為環保係好事，好似現時屋企都有收集廚餘作肥料嘅習慣。
施榮忻憂回本期長礙意欲
菁英會創會主席施榮忻亦認同計劃嘅理念，但覺得需要將其普及，吸引更多市民參加先有更大效果。佢話安裝太陽能板價值不菲，如果市民要先花一大筆費用安裝，之後要等長時間先能夠回本嘅話，就會窒礙咗市民參加計劃嘅意欲。
佢又大嘆現時天氣愈嚟愈熱，為地球出分力係刻不容緩，所以教導子女要有節約嘅概念，好似要有手尾熄燈、節約用水等，由生活習慣着手，令佢哋從小就養成好習慣咁話。
做二手名牌手袋生意起家嘅姚君達就自誇夠晒環保，但佢話唔會參加上網電價計劃，因為屋企無法安裝發電裝置囉！但佢就話香港人回收意識已經好普遍，特別係更換手提電話時，大家都習慣回收舊機喎。
卓妮