香港雖然係一塊福地，相比其他地區冇咁多天災，不過多人禍嗰度弊呢！淨係電梯意外就已經多到嚇怕人，唔通真係要人改行樓梯，斬腳趾避沙蟲？
就前幾日之嘛，荃灣又發生咗一單令人聽到都打冷震嘅電梯意外，一對八十後夫婦搭𨋢返屋企，點知部𨋢突然失控，火箭咁直飆上大廈四十六樓頂樓嘅升降機槽頂，呢對夫婦被拋起撞親頭部，再被槽頂跌落嚟嘅碎片打中頭同頸，一度危殆，好彩吉人天相，傷者嘅屋企人尋日探病後話情況已經穩定，總算係不幸中之大幸。
雖然話意外就係意料之外，不過呢單「電梯驚魂」其實係可以避免，事關出事屋苑原來四年前已經試過電梯失控，已經係一個警告信號，唔少居民都話啲𨋢行得唔順，要求管理處正視問題。好嘞，近日屋苑進行升降機更換工程，但唔知點解出事嗰部電梯並冇列入優先更換行列，結果釀成今次意外。事後消防處指電梯鋼纜有損毀，但負責安全監管嘅機電工程署就話升降機懸吊纜索完好冇事，連出事原因究竟係點都唔知，又點樣對症下藥，未雨綢繆，避免同類悲劇再發生？
話時話，大眾要求增加電梯安全監管嘅聲音不斷高漲，但機電工程署就一直闊佬懶理，拖延多年至推出工程人員註冊同評分制度，問題係當局胡混度日，有制度等於冇制度，電梯維修商評分點低都好，都唔驚冇嘢撈。冇錯，機電署有所謂巡查制度，弊在巡查速度慢過龜，巡完一輪至少需要七年，急驚風偏遇着慢郎中，唔出事就奇咯。大家有眼睇，近年電梯意外仍然不絕如縷，好似年前朗豪坊通天梯「打倒褪」咁，造成數十人受傷，真係諗起都怕怕。
最大問題係，家陣電梯維修競爭激烈，喺「價低者得」下，為咗投得合約，維修商將貨就價，好似原本需要三個人負責嘅工序，減至一個人包辦，試問點樣保證到質素？維修人員工作繁重，人工就低得可憐，士氣低落，又點能交出好貨？
電梯事故頻頻爆發，人人都知問題出喺邊度，偏偏官老爺如老僧入定，咁同草菅人命根本冇分別。有人話，香港公立醫院事故多多，病人一隻腳踏進醫院，另一隻腳就踏進森羅殿，其實電梯都係差唔多嘅咋，市民「聞梯色變」就係咁解。
一句到尾，香港表面上係安全城市，實際上根本唔係嗰回事。大樹冧下可以殺人，危樓倒塌可以殺人，招牌吊吊揈可以殺人，吊臂車路上行駛可以殺人，坐電梯都可能遇上意外，出入平安都變奢望咯喎，香港想唔淪為悲情城市都幾難。