政情：黃之鋒遲報到《文匯報》屈潛逃
本土民主前線黃台仰等多名涉嫌參與前年農曆新年旺角暴亂而被控嘅人士涉棄保潛逃。《文匯報》尋日就以頭版報道指，正就二○一四年「佔旺」案保釋等候上訴嘅香港眾志秘書長黃之鋒，並冇如期喺前日去香港仔警署報到，惹來棄保潛逃疑雲。黃之鋒近年官司纏身，唔通黃之鋒真係走咗佬？黃之鋒回覆我哋時就話，自己前晚有去報到。我哋都收到消息話黃之鋒的確係有去報到，只係遲到啫。原來只係誤會一場，《文匯報》仲煞有介事咁，真係貽笑大方喇！
頭版：「未如期向警署報到」
黃之鋒因二○一四年「佔旺」期間涉違反法庭禁制令，阻撓執達吏清場而被控刑事藐視法庭，去年被判入獄三個月，依家獲准保釋等候上訴。《文匯報》尋日煞有介事咁以「本報凌晨1時消息︰黃之鋒未如期向警署報到」大字標題作頭版報道，指黃之鋒原定逢周一、即前晚六時至九時要到香港仔警署報到，但該報記者就由前日下午到深夜都冇見黃之鋒進出警署。該報道仲話，警署已將有關情況通知咗負責該案件嘅「O記」、即有組織罪案及三合會調查科主管喎。
黃稱有報到 遲到四小時
其實黃之鋒前日有為另一宗向警隊索償嘅案件現身小額錢債審裁處，仲話要向警隊「追數」，冇理由咁快就走咗佬啩？我哋就問過黃之鋒，佢就話自己向來都遵守保釋條件，並居於報稱嘅地址，前晚亦都一如既往到警署報到，但報到時就未見到有記者咁話。而我哋亦都收到消息，指黃之鋒其實係尋日凌晨一時先至去報到，相比原定嘅晚上九時時限，足足遲咗四個鐘咁多。雖然遲到係冇乜特別責任嘅，不過到佢下次就該案件上庭時，有關方面就會上報法官喇。唔知黃之鋒係咪因為已經遲到，所以跑得太快，搞到記者見佢唔到呢？
黃之鋒過往都屢次被批評開會同出席活動時遲到o架喇，今次佢搞到畀《文匯報》老屈，都係因為唔守時呢個壞習慣，唔知佢幾時先會搣得甩呢個壞習慣喇！