中環出更：梁君彥英籍風波 立會研選主席須作聲明
仲記得今屆立法會開始時，大會主席梁君彥被揭擁有英國國籍，被質疑唔符合《基本法》規定，議會陣線朱凱廸更親赴英國調查事件。原來事隔一年多風波仍然未了。據了解，立法會議事規則委員會將會諮詢各議員，係咪需要規定主席候選人遞交國籍聲明。換言之，遲吓選主席都要驗明正身，唔係中國籍都危危乎嘞！
短期內諮詢議員
議事規則委員會尋日召開閉門會議，據悉會上委員曾就梁君彥國籍風波作討論，研究將來嘅主席候選人係咪要就國籍同居港年期作出聲明，定係繼續依賴目前嘅申報制度，委員會將會喺短期內按程序向所有議員進行諮詢。
另外，會上又討論係咪要檢討大會質詢同特首答問大會嘅安排，由於近來唔少議員提出緊急質詢時，喺會內花好多時間作討論，有意見認為阻礙其他審議工作，所以建議議員可以直接向特首提質詢慳番啲時間。
卓妮