中環出更：名人談困𨋢驚魂急墮六層嚇餐懵
早前荃灣一個屋苑發生升降機急升意外，令人膽戰心驚。香港嘅樓宇都往高空發展，個個人行出家門就免不了要搭電梯，都咪話唔擔心。尋日博愛醫院董事局舉行就職典禮，傾開原來唔少城中名人都有困𨋢嘅經歷，博愛醫院副主席吳錦青就試過喺中環一個商場搭電梯，原本想落地牢停車場，點知電梯急墮六層樓，嚇餐懵。
吳錦青話當時由商場三樓搭電梯想落地牢四層，點知部𨋢直插到地牢三層，停一停之後先至落番多一層。佢形容當時成個人被拋起，離心力好大，諗起都腳軟。依家佢出入呢個商場都寧願搭扶手電梯，盡量唔搭嗰部𨋢。
博愛永遠顧問譚姜美珠都試過困𨋢，有次佢搭屋企附近商場電梯去酒樓飲茶，當時喺地面入咗𨋢，感覺郁咗郁之後就停咗，但係電梯就唔開門，嚇到佢狂拍電梯門求救，雖然只係困咗幾分鐘，但係諗起都心有餘悸。
簡浩秋：唔一定舊就危險
做建築重型吊臂機工程嘅博愛永遠顧問簡浩秋就話電梯只要保養得宜，唔一定舊就會危險，好似佢細個住過嘅屋苑，部𨋢已經有五十幾年歷史，佢媽媽依家仲住緊層樓，但係部電梯冇問題喎。
出席就職典禮嘅仲有博愛副主席簡陳擷霞、總理梁天富同林麗儀等人。新主席李鋈發話，任內首要任務係爭取屯門藍地長者護理及護養安老院舍嘅政府撥款盡快落實，涉及金額大約十五至廿億元，令呢個全亞洲最大嘅安老院早日落成，造福長者。
卓妮