綠色先鋒：特惜玩具
親子工作坊製再生玩具，家長望子女學會珍惜。在一年一度的兒童節，不少小朋友都會收到玩具作禮物，玩得不亦樂乎，不過，數天過去，可能部分家長就會慨嘆：「咁快玩厭唔玩啦？」有社企推出親子工作坊，由家長和小朋友合力以廢棄物製作玩具，將玩具的耐玩度和變化大大提高，除了可向小朋友灌輸環保概念，亦可從製作過程中增進親子關係。
獨一無二更耐玩
「依家社會貧富懸殊好嚴重，有好多小朋友有太多玩具，玩到唔玩，但有啲小朋友就無玩具玩。我哋希望呢個工作坊整嘅玩具，係所有小朋友都玩得到同埋會鍾意玩。」社企「再生玩具店」負責人Paul指，自己由前年年底開始構思舉辦工作坊，為了令各階層都感興趣，他認為製作物料一定要是隨手可得的廢棄物料，而玩具本身則必須具趣味性，甚至比市面上賣數百元的玩具更好玩才會具吸引力。
以記者採訪當日為例，Paul在工作坊中示範如何以紙皮及竹籤等廢棄物料製作彈珠機。他一邊講解製作原理，一邊引導家長及小朋友發揮創意，「我只會示範最基本嘅做法，然後話畀佢哋知喺邊啲位開始，可以因應自己嘅喜好加唔同嘅元素，令到件玩具成為獨一無二嘅專屬玩具。」Paul指，這個做法可讓小朋友發揮想像力，甚至自定玩法，造出來的玩具耐玩度會高得多。
盼子女學會珍惜
工作坊另一個重點是「親子關係」，Paul認為製作過程中可以讓家長和小朋友有一個共同目標，對增進彼此關係有莫大裨益，「依家唔係太多家庭會有一齊做勞作或者整嘢食嘅習慣，其實家長同子女以『拍檔』身份落手落腳完成一件事，係一個好好嘅回憶，小朋友亦會格外珍惜造出嚟嘅玩具。」
「現成嘅玩具好多時玩一星期就唔玩，自己整就會玩耐啲，佢整完後都會show畀同學睇，分享呢個環保訊息。」與囡囡Pucca「母女檔」參加工作坊的Irene亦認為，由收集紙皮開始至完成玩具，可令囡囡明白到只要發揮創意，廢棄物料亦可擁有第二生命，變成玩具，「希望佢可以學會珍惜。」
圖：甘偉倫
文：陳名仲